Grasfrosch

Weihermühle

Ina zona umida amez guauds sitgs? Gea, sco in’oasa vegn la Weihermühle alimentada d’aua da funtauna. Marcada da questa ritgezza d’aua ed entras la tgira cuntinuada è sa sviluppada qua ina pedra natirala tut speziala.

Bovas furman la cuntrada

Vers la fin dal davos temp da glatsch han enormas bovas squassà la Val dal Rain tranter Glion e Cuira. La valletta Weihermühle è sa furmada tranter dus bratschs da la bova da Flem al nord ed al sid da las massas da material da la bova da plattamorta grischuna.
L’aua da funtauna che affluescha da las spundas da plattamorta grischuna en la Weihermühle vegniva duvrada dals umans a partir dal temp medieval. Il vegl mulin da graun in toc sur il territori natiral protegì dat perditga da quai. El è stà en funcziun enfin l’onn 1942.
Era il terren d’arschiglia dal fund da la val vegn utilisà dapi tschientaners sco prà da charetsch. Era il curt temp durant la Segunda guerra mundiala, cura che l’aual vegniva stagnà cun in rempar e duvrà sco puz da peschs, ha il charetsch survivì senza donns.

L’aua sco basa da viver per spezialists

Oz profiteschan surtut animals e plantas da la ritgezza d’aua en la Weihermühle. Tar ils abitants dal territori tutgan, sper amfibis e reptils, era spezias raras da libellas e salips sco per exempel la libella da funtauna Bolton u il salip da palì.

L’exclusivitad da quest territori

Sin ils terrens da turba bletschs cun pauc substanza nutritiva pon crescher unicamain plantas particularmain spezialisadas. Plantas bassas e discretas da charetsch e schervetta furman la vegetaziun da palì, qua e là embellida da bellezzas delicatas sco la primula farinusa u l’orchidea alva. Questas plantas ed ils terren bletschs èn fitg sensibels sin la chargia da passidas, perquai na duess ins betg passar sisur.

Diversitad grazia a mesiras da tgira

Mintga zona umida dovra ina tgira regulara. Manca quella cumenza ella a crescher en, i sa furma chagliom e la finala guaud. Era aua stagnada cumenza svelt a terrenisar e sto da temp en temp vegnir liberada da las plantas. Mo uschia pon lajets e puzs mantegnair lur funcziun sco abitadis custaivels.  La Pro Natura Grischun procura dapi decennis per ina tgira professiunala dals territoris natirals protegids. Il temp da lavur impundì è relativamain grond, vegn dentant pli che cumpensà entras la ritgezza dal territori.

 L’entir territori protegì impressiunescha entras sia diversitad da spazis vitals. Uschia sa barattan palids da schervetta cotschna, prads da chaglias autas, palids da charetsch grond, pradas da mulinetta, prads funtanitschs ed urs da prads mez sitgs da salvia. Questa diversitad sa fa era valair en il dumber impressiunant da las spezias. En differentas expertisas èn vegnidas cumprovadas 183 spezias da plantas, 360 spezias da tgirallas da la notg, 47 spezias da tgirallas dal di,  23 spezias da salips, 16 spezias da libellas, 3 spezias d’amfibis, differents reptils e mamifers pitschens.

Stadi da protecziun

Palì bassa d’impurtanza naziunala

Engaschament da la Pro Natura

Grazia a l’engaschament da la Pro Natura Grischun e da l’anteriura cumissiun per la protecziun da la natira da la Societad grischuna per la perscrutaziun da la natira SGN è la Weihermühle dapi il 1967 classifitgada sco territori natiral protegì. Gia il 1961 ha la cumissiun per la protecziun da la natira acquistà l’emprima parcella. Oz èn ca. 3,6 ha èn possess da la Pro Natura.

 

Naturschutzgebietdetails

Viadi

Cun la Viafier retica enfin a Panaduz u Razén, alura a pe.

Further Information

Info

Cumportament en il territori protegì:
Betg bandunar las vias e sendas signalisadas.
Betg charrar senza permissiun cun vehichels a motor sin las vias.
Tegnair ils chauns a la corda.
Betg campar u far bogn.
Betg tschiffar, disturbar, persequitar u introducir animals.
Betg cleger, chavar ora u introducir plantas.

Save

Print