Anemonenrüti (dustanza Rohan)

L’anemona cumina (Pulsatilla vulgaris) è ina da las spezias las pli periclitadas en Svizra. Sco bleras autras spezias da las pradas sitgas è ella tschessada en il decurs dals davos decennis pervi da la cultivaziun intensiva dals prads. La flur ha gugent glisch, e sch’il prà vegn ladà svanescha ella spert pervi da la concurrenza d’autras novas plantas. Ultra da quai ha l’anemona cumina gugent chaud e crescha perquai mo en lieus suleglivs. Questa flur d’in violet intensiv tutga tar la famiglia da las ranunculaceas ed è in dals emprims tachels da colur sin las pradas primavaunas. Cuntrari a sias spezias vischinas che creschan per la gronda part en regiuns alpinas, è l’anemona cumina adattada a la vita en las regiuns bassas.

La premissa indispensabla per proteger l’effectiv d’anemonas cuminas a Malans è la cultivaziun extensiva da la surfatscha protegida. Tuttina era il dumber da flurs fitg instabil dapi l’entschatta da la dumbraziun l’onn 1983. Perquai è vegnì lantschà l’onn 2007 in project da promoziun. Ins ha duvrà sems da las plantas da Malans per ina nova cultura e puspè plantà las plantinas sin il prà. Las stentas paran d’avair success, il dumber d’anemonas cuminas è puspè creschì ils davos onns.

L’utilisaziun bufatga  (desister da biocids, betg regular l’aua e segar tard il prà) promova era bleras autras spezias che dovran lieus sitgs. La stad pon ins p.ex. vesair il traifeglin tudestg (Dorycnium germanicum) fitg rar, il qual crescha en Svizra exclusivamain en la Val dal Rain grischuna.