Bergwiesen

Prads da muntogna da Mutten

Ils prads sitgs cun lur gronda varietad da spezias en l’abitadi gualser Obermutten èn in dals lieus nua che creschan las pli bleras paradisias en il Grischun.

In daletg per ils egls

Tranter la Val Alvra e Valragn giaschan a la costa sid da la Muttner Höhi ils culms da Mutten. La stad  dattan en egl sin quests prads sitgs la paradisia (Paradisea liliastrum). Questa spezia da gilgia periclitada potenzialmain crescha là     en in dumber impressiunant. Sin ils prads sitgs da Mutten creschan era differentas spezias d’orchideas. Medem sco la paradisia èn era tut las spezias d’orchideas protegidas en Svizra  (NHV 1991). Sco regla generala vala: pli bleras spezias d’orchideas ch’ins vesa sin in prà, pli auta è la diversitad florala. En ils prads da Mutten creschan nov differentas spezias d’orchideas. Questa cumposiziun da las spezias dat als prads sitgs in’impurtanza singulara sin plaun chantunal. Il temp principal da fluriziun èn ils prads da muntogna da Mutten in vair daletg, betg mo per ils visitaders, era las tgirallas, ils avieuls selvadis ed auters insects chattan qua ina funtauna ritga ed excellenta da nectar e pollens.

Qualitads dal terren

La flora en la regiun protegida variescha tenor il cuntegn d’acid dal terren. Ils terren sura, pli planivs cuntegnan dapli acid a la surfatscha. Perquai creschan surtut prads da tschorf airi cun bleras flurs. En las parts cunfinants pli spundivas chatt’ins plitost spezias da plantas che prefereschan terrens basofils sco per exempel il traifegl-balsam. Sur vastas parts da l’intschess protegì datti en il prà sitg indicaturs d’acid e da basa.  Quai è d’attribuir al sutterren. La plattamorta grischuna è in’unitad geologica eterogena e cuntegna ,tut tenor ils sediments, rasadas cun plitost bler chaltschina u bler quarz.

Cultivaziun necessaria

En tschertas parts vegnivan ils prads ladads u pasculads anc avant paucs onns. Ils prads che vegnivan cultivads gia pli baud sco prads da segar possedan oz ina pli gronda diversitad da las spezias. La Pro Natura s’occupescha, ensemen cun dus purs, da la tgira optimala – utilisaziun extensiva – per mantegnair e promover la diversitad da la flora. Cun engaschaments supplementars vegn revitalisà  ils spazis a l’ur creschids en ils ultims onns.
La cultivaziun dals prads sitgs dovra bler temp. Perquai è la Pro Natura Grischun  dependenta mintg’onn da l’engaschament da persunas voluntarias, dal servetsch civil u da praticantas e praticants che gidan a tgirar ils prads.

Cumportament sin l’intschess protegì:
Scumandà da cleger plantas e flurs
Betg bandunar las sendas uffizialas (marcadas cotschen sin la charta)
Tegnair il chaun vi da la corda
Betg far fieu u campar



Temps da visita favuraivels
Stad, la paradisia flurescha a la fin da zercladur/fanadur
Regiun
Viamala, Obermutten, vischnanca da Mutten
Grondezza
25 ha prà da muntogna
Viadi
Cun la viafier retica da San Murezzan u da Cuira a Tusaun, auto da posta ad Obermutten (reservaziun obligatorica).