Rombach
Senda tematica «A la riva dal Rom»
Scuvrì il Rom!
Il Rom è in dals pli bels flums principals d’ina val en Svizra. Nagina ovra idraulica retegna sia cursa, sias pradas magnificas èn restadas per la gronda part intactas ed èn vegnidas revalitadas ils davos onns. Il spazi dal flum è vegnì schlargià generusamain sur lungs tschancuns, uschia ch’el ha ussa puspè ses letg originar.
A las rivas natiralas dal flum nascha nova vita. La litgiva d’aua indigena chatta per exempel puspè in spazi da viver ideal ed a las rivas pon ins scuvrir ina flora fascinanta.
Per che vus possias experimentar il Rom d’atgna iniziativa ha la Biosfera Val Müstair stgaffi cun agid da la Pro Natura Grischun la senda tematica signalisada «A la riva dal Rom» ed edì ina pratica broschura d’infurmaziun ritgamain illustrada.
La senda tematica
La spassegiada sin la senda tematica cumenza a la funtauna dal Rom a Tschierv e maina enfin al cunfin talian. Vus passais palids bassas, viandais lung las rivas natiralas dal flum, surmuntais parts stippas da l’aual e passais tras zonas alluvialas abitadas da dialas misteriusas. Sche vus vulais savair danunder che l’aua da funtauna vegn, muntais vus si tar las dolinas da l’alp da Munt e descendais da là giu en il territori da la funtauna.
Preferis vus forsa da visitar il flum en la vischinanza da vossa dimora u voss lieu da vacanzas? Nagin problem. Vus pudais cumenzar la senda tematica «A la riva dal Rom» en differents lieus d’entrada. In’autra giada pudais vus alura chaminar aval u amunt sin in nov tschancun da la senda. Faschai stim dals mussavias da viandar mellens marcads cun il tatgader "A la riva dal Rom" ruta da viandar 801.
Remartgas impurtantas
La senda tematica «A la Riva dal Rom» è in divertiment per pitschen e grond: lev da chaminar, cun bleras pussaivladads da far in paus, dus plazs da gieu cun fuaina directamain sper l’aua (a Valchava e Müstair) e numerusas ustarias en ils vitgs en vischinanza da la ruta. Da recumandar èn buns chalzers e vestgadira da reserva per ils uffants che giogan gugent sper l’aua.
La senda davent da Süsom Tschierv enfin al cunfin naziunal a Müstair Sotrivas – Cunfin è circa 14 km lunga, ha mo paucas muntadas e po vegnir interrutta en mintga vitg.
La broschura d’infurmaziun
Ina pratica broschura illustrada cun ina charta da viandar ed indicaziuns exactas da la via as accumpogna sin vossa expediziun. La charta è ordinada tenor accents tematics e porscha bleras infurmaziuns interessantas davart la flora e fauna, davart la cultura e l’istorgia variada dal Rom. Tut tenor voss lieu da partenza e voss interess pudais vus era definir cun agid da la broschura la ruta ed eleger ils plazs, nua che vus vulais far in paus. Las ritgas infurmaziuns pon ins alura leger ruassaivlamain als lieus da fermada.
La broschura survegnis vus en la Val Müstair en ils biros turistics, en ils uffizis da posta u en voss hotel.
Pretsch: SFr. 15.-
«A la riva dal Rom – lavuratori d’experientschas» – ina purschida per classas da scola en la Val Müstair
«A la riva dal Rom» è ina senda da viandar ordvart bella che maina lung il Rom tras la Val Müstair. Ella è vegnida planisada e realisada da la Pro Natura Val Müstair. Il project parzial da la Biosfera Val Müstair – Parc Naziunal è vegnì premià ed è qua tras fitg enconuschent.
Ina nova purschida avra il Rom ussa era per uffants da scola ed als permetta d’experimentar la fascinaziun da la cursa natirala da l’aua.
En il „lavuratori d’experientschas sper l’aual“ pon ils uffants lavurar e giugar sper l’aual sut la directiva da scolastas e scolasts u da manaders da gruppa e far experiments per scuvrir munds zuppads da l’aua. Cun agid da texts e gieus pon els emprender d’enconuscher l’aua sco element vital ed exercitar in’utilisaziun responsabla da l’aua.
Als responsabels stattan a disposiziun models da copiar cun propostas ed impuls per talas activitads, medemamain descripziuns detagliadas dals tschancuns da via e dals lieus adattads per pavurar cun uffants sper l’aual. Quest material d’infurmaziun stat a disposiziun per invista en il secretariat da la Biosfera sco era en ils alloschaments principals da classas da scola en la val.
Sch’ils scolasts e las scolastas han ina giada decidì tge ch’els vulan far cun ils uffants, pon els emprestar gratuitamain il material necessari (palas, zaivers, crivels, litteratura da determinaziun, etc.) en il secretariat da la Biosfera. Il material vegn furnì al lieu d’alloschament ed era puspè prendì enavos là.
La purschida è adattada per uffants da la scolina enfin al stgalim secundar I. Nus cussegliain da lavurar cun gruppas da maximalmain 20 uffants.
Contact:
u
Margit Huber-Berninger
Chasa sper l’aua
7536 Santa Maria
E-Mail: @email
Naturschutzgebietdetails
Viadi
Cun la Viafier retica enfin a Zernez, da là cun l’auto da posta sur il Pass dal Furn enfin a Fuldera d’aint.
Purschidas
Broschura d’infurmaziun davart la senda tematica «A la riva dal Rom» da Tschierv fin al cunfin talian. Da grond interess èn plinavant la claustra da Son Jon a Müstair (patrimoni mundial) ed il Parc Naziunal Svizzer.
Further Information
Info
Cumportament:
Tegnair ils chauns a la corda.
Scumandà da far fieu e da campar.